Tune to BFM 91.2|Biratnagar

एकल इजलासको आदेशमाथि छलफल गर्न बार सल्लाहकार समितिको आकस्मिक बैठक

विराटनगर, १८ भदौ । सर्वाेच्च अदालतले बिहीबार जारी गरेको अन्तरिम आदेशबारे कानून व्यवसायीहरुको छाता संगठन नेपाल बार एसोसिएसनले गम्भिर छलफल गर्ने भएको छ । बारले आइतबार लागि सल्लाहकार समितिको आकस्मिक बैठक डाक्ने निर्णय गरेको हो ।

महत्वपूर्ण निर्णय लिनुअघि बारले यस्तो बैठक बोलाउने गर्छ । नेपाल बार एसोसिएसनका अध्यक्ष एवं वरिष्ठ अधिवक्ता चण्डेश्वर श्रेष्ठले न्यायालयको विकृति विसंगतिबारे पछिल्लो प्रतिवेदन र समसामयिक विषयमा छलफल गर्न बैठक डाकिएको बताउनुभयो । उहाँले भन्नुभयोे, ‘प्रतिवेदन लगायत केही समसामयिक विषय छलफलको एजेण्डा बन्ने छन् ।’ बारका महासचिव लिलामणी पौड्यालका अनुसार, आइतबारलाई डाकिएको बैठकमा मुख्यतः तीनवटा एजेण्डा छन् । पहिलो, बिहीबार न्यायाधीश हरि फूयालले जारी गरेको आदेशवारे छलफल गर्ने ।

दोस्रो, अघिल्लो शुक्रबार प्रधानन्यायाधीश चोलेन्द्रशम्सेर जबराले आफू इजलासमा नबस्ने भनी अलिखित रुपमा इजलासमा आएर बोलेको आदेशबारे छलफल गर्ने । र, तेस्रो, न्यायालयको विकृति विसंगति हटाउने प्रतिवेदन लगायतका विषय छन् । बारका एक पदाधिकारीका अनुसार, सर्वाेच्च अदालतभित्र दुई समूहमा विभक्त भएको गुटको परिणाम स्वरुप बिहीबारको घटनाक्रम विकसित भएको निष्कर्ष पदाधिकारीहरुको छ ।

एउटा समूहले अर्काेलाई प्रतिवाद गर्न आफ्नो गुटका सदस्यहरु नै प्रयोग गर्ने गरेको भन्दै यसवारे गम्भिर रुपमा छलफल हुनुपर्ने आवाज उठेपछि सल्लाहकार समितिको बैठक डाकिएको हो । बारको सल्लाहकार समितिमा पूर्व अध्यक्षदेखि कोषाध्यक्षसम्मका पदाधिकारी, वरिष्ठ अधिवक्ता र पूर्वमहान्यायाधिवक्ताहरुलाई बोलाउने गरिन्छ । कोभिड महामारीको जोखिम नघटेकाले सीमित व्यक्तिलाई मात्रै डाक्ने तयारी छ ।

Leave a Reply

Your email address will not be published. Required fields are marked *

Call Now Button