Tune to BFM 91.2|Biratnagar

जोगवनीमा भेटियो नेपालीको शव, मृतक युवा इटहरीका भएको हुनसक्ने आशंका

विराटनगर, ६ कात्तिक । अन्दाजी २५÷२६ वर्षीय एक नेपाली युवाको शव भारतको जोगवनी बजार नजिकै आज बिहान भेटिएको छ । नाक र मुखबाट रगत बगिरहेको तथा शरीरका केही भागमा निलडाम देखिएका कारण युवाको हत्या भएको हुनसक्ने अनुमान गरिएको हो ।

तर मृत भेटिएका युवा सुनसरी इटहरीका भएको बताइए पनि पहिचान भने भएको छैन । इलाका प्रहरी कार्यालय रानीका प्रहरी निरीक्षक दीपक थापाले नेपाल–भारत सीमा क्षेत्रको दशगजा नजिकै भारतीय भूमिका शव भेटिएको बताउनुु भयो ।

उहाँका अनुसार घटनास्थल विराटनगर महानगरपालिका–१६ दक्षिण गेटबाट लगभग सय मिटर पर भारततर्फ पर्छ । सीमा क्षेत्रका बासिन्दाले मृतक युवा सुनसरी इटहरीका भएको भनेर प्रहरीलाई जानकारी दिए पनि उनीहरुले नाम भने थाहा नभएको बताएका छन् । मृतक लागुऔषधका दुव्र्यसनी रहेको जानकारी प्रहरीलाई स्थानीयले दिएका छन् । लागुऔषध सेवनका लागि नियमित रुपमा जोगवनी आउजाउ गर्ने गरेका कारण स्थानीयले इटहरीका युवा भनेर चिनेको प्रहरीले जनाएको छ ।

प्रहरी निरीक्षक थापाले आफन्त र परिवारका कोही पनि सदस्य सम्पर्कमा आइनसकेकाले मृतकको पहिचान हुन नसकेको बताउनु भयो । घटनाको प्रकृति हेर्दा हत्या हो या लागुऔषधको अत्याधिक सेवनका कारण ज्यान गयोभन्ने यकिन गर्न नसकिने उहाँको भनाइ छ । सीमा क्षेत्रका बासिन्दाले इटहरी घर बताएका कारण युवा नेपाली भएको प्रारम्भिक अनुसन्धानबाट खुलेको प्रहरीको भनाइ छ । मृतक युवाका अभिभावक र आफन्तको खोजी थालिएको थापाले बताउनु भयो ।

दुवै हातमा ट्याटु रहेका मृतकले सेतो जुत्ता, निलो रंगको जिन्स पेन्ट र गाडा निलो रंगको सर्ट लगाएको जानकारी उहाँले दिनु भयो । भारतीय भूमिमा शव भेटिएका कारण घटनाको अनुसन्धान गर्दै कानुनी प्रक्रिया भारतीय प्रहरीले अघि बढाउने भएको छ ।

भारतीय प्रहरीले घटनास्थलबाट उठाएर शव पोस्टमार्टमका लागि लगेको छ । नेपाल–भारत सीमा क्षेत्रमा युवाको शव भेटिएका कारण घटनाको अनुसन्धानमा भारतीय प्रहरीलाई सहयोग गरिने थापाले बताउनु भयो ।

Leave a Reply

Your email address will not be published. Required fields are marked *

Call Now Button