Tune to BFM 91.2|Biratnagar

प्रदेश १ मा कोरोनाका शंकास्पद ३ सय ५५ जनाको नमूना संकलन

विराटनगर, ६ वैशाख । प्रदेश १ मा पीसीआर विधिबाट ३ सय ५५ जनामा कोरोना परीक्षण गरिएको छ । मुख्यमन्त्री तथा मन्त्रिपरिषद् कार्यालयको कोरोना सूचना डेस्कका अनुसार ६७ महिला र २ सय ८८ पुरुषको नमूना परीक्षण भएको हो ।

१२ जना पुरुषको रिपोर्ट पोजेटिभ आएको छ । ५१ महिला र २ सय ४४ पुरुष गरी जम्मा २ सय ९५ जनाको नमूना नेगेटिभ आएको छ । द्रुत परीक्षण विधि (र्यापिड डाइग्नोष्टिक टेस्ट) बाट हिजोसम्म जम्मा १ हजार ९२ जनाको नमूना परीक्षण भएको छ । जसमा दुई जनाको रिर्पोट पोजेटिभ देखिएको थियो ।

परीक्षण गर्दा बुढीगंगा गाउँपालिका मोरङमा होम क्वारेन्टाइनमा बसेकी महिलाको र्यापिड डाइग्नोष्टिक टेस्टमा पोजेटिभ देखिए पनि स्वाब पीसीआर विधिबाट ल्याबमा परीक्षण गर्दा नेगेटिभ आएको मुख्यमन्त्री तथा मन्त्रिपरिषद् कार्यालयमा रहेको कोरोना सूचना डेस्कले जनाएको छ ।

त्यस्तै झापा हल्दीबारीका युवाको र्यापिड टेस्टमा पोजेटिभ आएको भएपनि कोशी अस्पतालमा पीसीआर टेस्टमा नेगेटिभ रिपोर्ट आएको थियो । र्यापिड टेस्टबाट शुक्रबारसम्म जम्मा १ हजार ९० जनाको रिपोर्ट नेगेटिभ आएको छ । धरानको वीपी कोइराला स्वास्थ्य विज्ञान प्रतिष्ठान र विराटनगरको कोशी अस्पतालमा पीसीआर विधिबाट नमुना परीक्षण हुँदै आएको छ । प्रदेश १ सरकारले जिल्लाका क्वारेन्टाइनमा राखिएका व्यक्तिहरुको नमूना परीक्षणलाई तिव्रता दिएको जनाएको छ ।

यता, प्रदेश सरकारले निर्माण गरेका क्वारेन्टाइन स्थलमा बस्नेको संख्या हिजोम्म कूल ५ सय ९५ जना छ । जसमा ६२ महिला र ५ सय ३३ पुरुष छन् । १३ महिला र ४९ पुरुष गरी जम्मा ६२ जना डिस्चार्ज भएका छन् । आइसोलेसनमा स्वास्थ्यकर्मीको निगरानीमा रहेका एक एक महिला र एक पुरुष डिस्चार्ज भएका छन् ।

शुक्रबारसम्म आइसोलेसनमा जम्मा १० जना बसिरहेका छन् । होम क्वारेन्टाइनमा जम्मा ४ हजार १९ जना बसिरहेको मुख्यमन्त्री तथा मन्त्रिपरिषद् कार्यालयले जनाएको छ । क्वारेन्टाइनमा बस्नेमा महिला ६ सय ८१ र पुरुष ३ हजार ३ सय ३८ जना छन् ।

Leave a Reply

Your email address will not be published. Required fields are marked *

Call Now Button