विराटनगर महानगरपालिकामा बम विष्फोट

0
93

विराटनगर, २७ साउन । विराटनगर महानगरपालिका कार्यालय भित्र आज दिउँसो २ बजे बम विष्फोट भएको छ । महानगरपालिका कार्यालयको पहिलो तालाको प्यासेजमा विष्फोट भएको हो । मेयर भीम पराजुली र प्रमुख प्रशासकिय अधिकृत कुमारप्रसाद दाहालको कार्य कक्षको बीचमा रहेको प्यासेजमा विष्फोट भएको हो । प्रहरीले प्रेसर कुकर बम विष्फोट भएको हुन सक्ने बताए पनि यकिन भइसकेको छैन । विष्फोटबाट नगरपालिकाको झ्यालका सिसा फुटेका छन् । प्यासेजमा रहेका सोफा र दराज टुक्राटुक्रा भएका छन् । मेयर पराजुलीले चढ्दै आएको को १ झ ४९४ नम्बरको गाडीको पछाडि पट्टीको सिसा फुटेको छ । विष्फोटपछि धुवाँको मुस्लो छुट्दा कार्यालयका कर्मचारी र सेवाग्राहीबीच भागदौड मच्चिएको थियो । विष्फोटको आवाजले कार्यालय सहयोगी शिवचन्द्र ठाकुर बेहोस भएको प्रहरीले जनाएको छ । ठाकुरको कोसी अञ्चल अस्पताल विराटनगरमा उपचार भइरहेको छ । मेयर पराजुलीले महानगरपालिका जनताको कार्यालय भएका कारण बम विष्फोट हुने कुरामा कुनै आशंका गर्न नसकिएको बेला एक्कासि विष्फोटको आवाज आएको बताउनु भयो । ‘महानगरपालिकामा बम विष्फोट हुन्छ भन्ने कुराको अनुमान गर्न सक्ने कुनै सम्भावनानै भएन,’ उहाँले भन्नु भयो, ‘जसले घटना गराए पनि निन्दनिय र खेदजनक छ ।’ उहाँले कुनै आन्दोलनका नाममा यस्तो घटना भएको भए पनि त्यो गलत भएको बताउनु भयो । मेयर पराजुलीले घटनामा कुनै मानविय क्षति भने नभएको जानकारी दिनु भयो । उहाँले ठूलो संख्यामा सेवाग्राहीको चाप हुने महानगरपालिकामा बम विस्फोट गराउने काम निन्दनीय भएकाले यसले कसैलाई पनि फाइदा नपुग्ने बताउनु भयो । उहाँले जनताको कार्यालयमा विष्फोट गर्ने कार्य कोहीकसैबाट पनि हुन नहुने बताउनु भयो । प्रहरीले महानगरपालिका कार्यालयमा सिल गरेर घटनाको अनुसन्धान सुरु गरिएको जनाएको छ । घटनास्थलमा प्रहरीका तालिम प्राप्त कुकुर सहितको अपराध अनुसन्धानमा विशेष दखल राख्ने प्रहरी टोली परिचालन गरेर घटनाको अनुसन्धान सुरु गरिएको बताइएको छ । सशस्त्र र नेपाली सेनाको टोली पनि परिचालित छ । मोरङ प्रहरी प्रमुख एसपी मनोजकुमार केसीले बम विष्फोटको जिम्मा कसैले पनि नलिएको र मिहिन ढंगबाट घटनाको अनुसन्धान सुरु गरिएको बताउनु भयो । उहाँले संकास्पद आठ जना व्यक्तिहरुलाई नियन्त्रणमा लिएर अनुसन्धान र सोधपुछ गर्ने काम भइरहेका कारण उनीहरुको नाम र ठेगाना भने गोप्य राखिएको बताउनु भयो । पक्राउ परेकाहरुको राजनैतिक आवद्धता र विगतका पृष्ठभूमिका बारेमा प्रहरीले अनुसन्धान गरिरहेको छ । केसीले महानगरपालिकामा सीसी टिभी जडान गरिएका कारण घटनाका बारेमा चाँडै पत्ता लाग्ने बताउनु भयो । उहाँका अनुसार सिसी टिभी फुटेज हेरेर पनि घटनाका बारेमा पत्ता लगाउने प्रयास भइरहेको छ । केसीले घटनास्थलमा टिनका टुक्राहरु पनि फेला परेको बताउनु भयो । विष्फोटबाट फुटेका सिसाका टुक्रा महानगरपालिका कार्यालय परिषरमा यत्रतत्र छरिएका छन् । एसपी केसीले कसले र के उदेश्य राखेर विष्फोट गराएको भन्ने कुरा अनुसन्धानपछि मात्रै खुल्ने जानकारी दिनु भयो । विष्फोटपछि जिल्ला सुरक्षा समिति मोरङको बैठक बसेर विराटनगरको सुरक्षा व्यवस्था कडा पार्ने निर्णय पनि गरेको छ । महानगरपालिकाका एक कर्मचारीका अनुसार केही दिन अघि नेत्रविक्रम चन्द ‘विप्लव’ नेत्रृत्वको नेपाल कम्युनिष्ट पार्टीले पत्र पठाएरै चन्दा माग गरेको थियो । प्रहरीले पनि नेकपाले विष्फोट गराएको हुन सक्ने जनाएको छ ।

Comments

comments

LEAVE A REPLY

Please enter your comment!
Please enter your name here