.

कोशीमा सरकार जोगाउन शेरधन राईको पहल, राजेन्द्र राईलाई आलोपालो मुख्यमन्त्री प्रस्ताव

विराटनगर ,२ असोज । हिक्मतकुमार कार्की नेतृत्वको कोशी प्रदेश सरकार जोगाउन नेकपा एमाले नेता शेरधन राईले  पूर्व सहकर्मी तथा नेकपा एकिकृत समाजवादी पार्टी कोशी प्रदेश संसदीय दलका नेता राजेन्द्र राईलाई आलोपालो मुख्यमन्त्रीको प्रस्ताव गरेका छन् ।


आइतबार बेलुका धरानमा भएको भेटमा शेरधनले राजेन्द्रलाई मध्यवधी टार्नका लागि आलोपालो नेतृत्वको प्रस्ताव गरेका हुन् । शेरधनको प्रस्तावमा राजेन्द्र राईले अहिलेकै सरकारलाई सहयोग गर्न नसकिने जवाफ दिएका छन् ।


दुवै नेता भोजपुरका हुन् । गृहजिल्लामा नेकपा एमालेको राजनीति गरेका दुई नेताको पार्टी विभाजनपछि भेट भएको थिएन् । आइतबार शेरधन राईकै पहलमा दुई नेताबीच वा टु वान  भेटघाट भएको थियो ।


वर्तमान सरकार टिकाउनका लागि प्रदेशको पहिलो मुख्यमन्त्री शेरधनले पूर्व मुख्यमन्त्री राजेन्द्रलाई  एमाले र राप्रपासहित आलोपालो सरकारको नेतृत्वका लागि प्रस्ताव गरेका थिए  । राजेन्द्र राईले भने संविधानको धारा १६८ को उपधारा ३ अनुसार बनेको वर्तमान सरकारलाई सहयोग नगर्ने जवाफ फर्काए । 


सर्वोच्च अदालतको परमादेशपछि गत भदौं २२ गते एमाले संसदीय दलका नेता हिक्मतकुमार कार्की मुख्यमन्त्री नियुक्त  भएका थिए ।  कार्की अल्पमत र प्रतिपक्षमा बहुमत छ । 


कार्कीको पक्षमा उपसभामुख सृजना दनुवार बाहेक एमालेका ३९ र राप्रपाका   ६ गरी  ४५ सांसद छन् । उनको विपक्षमा नेपाली  कांग्रेसका २९, माओवादी केन्द्रका १३, नेकपा एकिकृत समाजवादी पार्टीका ४ र जपसाको एक गरी  ४७ सांसद छन् । जुन ९३ सदस्यीय प्रदेशसभामा टुप्लुक्क बहुमत हो । प्रतिपक्षमा रहेको नेकपा एकिकृत समाजवादीले समर्थन गरेको अवस्थामा  भने कार्कीले विश्वासको मत पाउँछन् ।


‘मिलेर सरकार बनाएर मध्यवधी रोक्नुपर्छ भन्ने कुरा उहाँको थियो,त्यसमा राप्रपासहित आलोपालो सरकार  बनाउने, त्यसमा भएन भने सबै दल मिलेर सरकार बनाएर मध्यवधीबाट जोगाउनुपर्छ भन्ने कुरा उहाँको थियो,’उनले भने,‘ उपधारा ३ अनुसार बनेको सरकारलाई चाहिँ स्पष्ट रुपमा विश्वासको मत दिन सकिदैन, किन भने यो जालसादीबाट बनेको छ, उपधारा ५ मा गएपछि छलफल गर्न सकिन्छ भनेको छु ।’


केन्द्रमा छुट्टै गठबन्धन भएकाले केन्द्रीय नेतृत्वसँग पनि छलफल गरेर अघि बढ्नु पर्ने उनले बताए  ।


नेकपा एमाले नेता तथा कोशी प्रदेशका पूर्व  मुख्यमन्त्री शेरधन राईले पनि राजेन्द्र  राईसँग समसामयीक विषयमा छलफल भएको बताए ।


यो खबर पढेर तपाईलाई कस्तो महसुस भयो ?

प्रतिक्रिया दिनुहोस्
प्रतिक्रिया