विराटनगर , ५ । नेपाल प्रहरीमा कार्यरत प्रहरी हवल्दार सप्तराज राई मृत फेला पर्नुभएको छ । झापाको हल्दिबारी गाउँपालिका–५ स्थित त्रिवेणी टोल निवासी ४२ वर्षीय प्रहरी हवल्दार राई आफ्नै घरमा झुन्डिएको अवस्थामा आज बिहान मृत फेला पर्नुभएको जिल्ला प्रहरी कार्यालय झापाले जनाएको छ।
इलाका प्रहरी कार्यालय डोरिया मोरङ दरबन्दी भई हाल अस्थायी प्रहरी चौकी डाम्राभिट्टामा कार्यरत राई बिदा लिएर हिजो साँझ घर फर्किनुभएको थियो। प्रहरीका अनुसार घर आउनुभएका उहाँले अत्याधिक मदिरा सेवन गरी राति परिवारसँग झै–झगडा गरेको छिमेकीले बताएका छन्।
श्रीमती र छोरीहरूसँग झगडा गरेकै राती उहाँ आफ्नो सुत्ने कोठामा फलामको बलोमा खादा (कपडा)को पासो लगाई झुन्डिएको अवस्थामा फेला परेको प्रहरीले जनाएको छ। आज बिहान श्रीमतीले श्रीमान् झुन्डिएको अवस्थामा देखेपछि तत्काल छरछिमेकलाई खबर गरेकी थिइन । त्यसपछि घटनास्थलमा प्रहरी टोलीले पुगेका थिए।
मृतक राईको श्रीमती, १५, १२ र ४ वर्षका ३ जना छोरी रहेका छन्। जिल्ला प्रहरी कार्यालय झापाको टोली घटनास्थल पुगेर कानुनी प्रक्रिया पूरा गरी शवलाई पोस्टमार्टमका लागि प्रादेशिक अस्पताल भद्रपुर पठाएको छ। यता प्रहरीले घटनाको बारेमा थप अनुसन्धान गरिरहेको प्रहरी कार्यालय झापाका डीएसपी खगेन्द्रप्रसाद रिजालले जानकारी दिनुभयो।
