विराटनगर ,१६ कात्तिक । नेपाली कांग्रेसका महामन्त्री विश्व प्रकाश शर्माले हमासको नियन्त्रणमा रहनुभएका विपीन जोशीको उद्दारका लागि आग्रह गर्नुभएको छ ।
आज प्रतिनिधिसभा बैठकको शून्य समयमा बोल्दै उहाँले विपीन हमासको नियन्त्रणमा रहेको पुष्टि भएकाले कतार सरकारसँग संवाद गरेर उद्दार गर्न सभामुखमार्फत् प्रधानमन्त्री र परराष्ट्रमन्त्रीको ध्यानाकर्षण गराउनुभयो।
उहाँले भन्नुभयो,‘नेपाली विद्यार्थी विपीन जोशी हमासको नियन्त्रणमा रहेको पुष्टि भएको छ। कतार सरकारमार्फत् कुरा गरेर उनलाई उद्धार गर्न सकिने संभावना औंल्याइएका छन्। यो विषयमा गम्भीर पहल गर्न सभामुखमार्फत् प्रधानमन्त्री र परराष्ट्रमन्त्रीको ध्यानाकर्षण गराउन चाहन्छु।’
विपीन हमासको नियन्त्रणमा रहेको इजरायल सरकारले पुष्टि गरेको छ । विपीन इजरायल र हमासबीच युद्धका क्रममा बेपत्ता हुनुभएको थियो । उहाँका साथीहरूले हमासले नियन्त्रणमा लिएर लगेको भनिएपनि उहाँको अवस्था अज्ञात थियो । तर, इजरायल सरकारले विपीन हमासको नियन्त्रणमा रहेको दावी गरेको छ ।
यस्तै, महामन्त्री शर्माले काकटभिट्टा नाका खुला गर्न पनि सरकारसँग माग गर्नुभएको छ । कोभिडकालमा बन्द भएको सो नाका अहिलेसम्म संचालनमा आउन सकेको छैन । नाका संचालनमा नआउँदा त्यहाँ होटल यातायात र सम्पूर्ण पर्यटन क्षेत्रमा असर परिरहेको उहाँको भनाइ छ ।
महामन्त्री शर्माले भारत, बंगलादेश र भुटान ३ देशसँग जोडिएको सीमानाका काकटभिट्टा भारतीय अध्यागमनका कर्मचारीका कारण संचालनमा आउन नसकेको बताउनुभयो ।
‘कोभिडको बेला वीरगन्ज र नेपालगन्जका नाका खुला भइसेका छन् । तर, भारतीय अध्यागमनले पर्यटकको इन्ट्री र एक्जिटलाई खुला नगरेका कारण सो नाकामा पर्यटक आवागमनमा अवरोध जारी छयसले त्यहाँको होटल यातायात र सम्पूर्ण पर्यटनक्षेत्रमा असर परिरहेको छ,’उहाँले भन्नुभयो,‘सरकारले अबिलम्ब भारत सरकारसँग संवाद गरेर काकटभिट्टा नाका सुचारु गर्न आग्रह गर्न चाहन्छु ।’
यो खबर पढेर तपाईलाई कस्तो महसुस भयो ?
