आईसीसी विश्वकप क्रिकेट लिग–२ मा नेपालले लगातार तेस्रो खेल हारेको छ ।
नेदरल्यान्ड्समा चलिरहेको शृङ्खलाअन्तर्गत गएराति सम्पन्न खेलमा नेपाल नामिवियासँग ३ रनले पराजित भएको हो । २१२ रनको लक्ष्य पछ्याएको नेपालले निर्धारित ५० ओभरमा ६ विकेट गुमाउँदै २०८ रनमात्र बनाउन सक्यो । नेपालका लागि आसिफ शेखले ४५ रन, कप्तान रोहित पौडेलले ४१, आरिफ शेखले ३८, कुशल भुर्तेलले ३४ तथा गुल्शन झाले अविजित १९ रन बनाए ।
नामिवियाका लागि ज्याक ब्रासेलले ३ विकेट लिए भने रुबेन ट्रम्पलमनले २ विकेट लिए । त्यसअघि टस हारेर पहिला ब्याटिङ गरेको नामिवियाले ५० ओभरमा ७ विकेट गुमाउँदै २११ रन बनाएको थियो नेपालका करण केसीले ५ विकेट लिए । यससँगै करण नेपालका लागि ओडीआई क्रिकेटमा १०० विकेट पूरा गर्ने दोस्रो खेलाडी पनि बनेका छन् ।
यसअघि नेपाल आयोजक नेदरल्याण्डससँग ६ विकेटले र नामिवियासँग ८ विकेटले पराजित भएको थियो । लगातार तेस्रो हारसँगै नेपालका लागि लिग–२ को शीर्ष चारमा रहँदै विश्वकप ग्लोबल क्वालिफायरमा स्थान बनाउने सम्भावना कठिन बनेको छ ।
नेपालले अब शृङ्खलाको अन्तिम खेल भोलि आयोजक नेदरल्यान्ड्ससँग खेल्नेछ ।