राहदानी छपाइ तथा खरिद प्रक्रियामा अनियमितता भएको आशंकापछि अख्तियार दुरूपयोग अनुसन्धान आयोगले राहदानी विभागका महानिर्देशक तीर्थराज अर्यालसहित चार जनालाई नियन्त्रणमा लिएर अनुसन्धान अघि बढाएको छ ।
अख्तियार स्रोतका अनुसार आयोगको टोलीले त्रिपुरेश्वरस्थित राहदानी विभागमा पुगेर महानिर्देशक अर्याललाई नियन्त्रणमा लिएको हो । उनीसँग राहदानी आपूर्ति तथा खरिद प्रक्रियासम्बन्धी विभिन्न विषयमा बयान लिने र थप सोधपुछ गर्ने काम भइरहेको बताइएको छ ।
यसअघि सोमबार साँझ नै अख्तियारको टोली विभाग पुगेको थियो । टोलीले राहदानी खरिद र छपाइसँग सम्बन्धित महत्त्वपूर्ण कागजातहरू नियन्त्रणमा लिएर अध्ययन थालेको स्रोतको दाबी छ । अनुसन्धानको क्रममा विभागभित्र भएका निर्णय, टेन्डर प्रक्रिया तथा सम्झौतासम्बन्धी फाइलहरू समेत संकलन गरिएको जनाइएको छ ।
स्रोतका अनुसार महानिर्देशक अर्याल सोमबार प्रधानमन्त्रीलाई भेट्न बालुवाटार पुगेका थिए । त्यसलगत्तै अख्तियारले उनीमाथि निगरानी बढाएको र अनुसन्धान प्रक्रिया तीव्र बनाएको बताइएको छ ।
राहदानी छपाइसँग जोडिएको यस प्रकरणमा अख्तियारले व्यवसायी सिद्धार्थ थापालाई पनि नियन्त्रणमा लिएको छ । उनी राहदानी छपाइ प्रक्रियामा संलग्न कम्पनी ‘भेरिडोस’सँग सम्बन्धित व्यवसायी हुन् ।
अनुसन्धानको दायरा विभागका अन्य उच्च अधिकारीसम्म पनि पुगेको छ । विभागका प्रशासन तथा व्यवस्थापन शाखा प्रमुख एवं प्रवक्ता सोमेश थापा तथा सूचना प्रविधि शाखाका निर्देशक सुनीलकुमार केसीलाई समेत अख्तियारले नियन्त्रणमा लिएर सोधपुछ गरिरहेको स्रोतले जनाएको छ ।
हाल विभागमा पुरानो राहदानी छपाइ सम्झौताको अवधि समाप्त भएपछि जर्मनीका दुई कम्पनीले नयाँ राहदानी छपाइको ठेक्का पाएका छन् । यही ठेक्का प्रक्रिया, मूल्य निर्धारण, प्राविधिक मूल्यांकन तथा खरिद निर्णयसँग सम्बन्धित विषयमा अनियमितता भएको उजुरी परेपछि अख्तियार सक्रिय भएको हो ।
राहदानी जस्तो राष्ट्रिय सुरक्षा र नागरिक पहिचानसँग प्रत्यक्ष जोडिएको संवेदनशील कागजातको खरिद प्रक्रियामा मिलेमतो, आर्थिक चलखेल तथा पदको दुरुपयोग भएको हुन सक्ने आशंकामा आयोगले विशेष अनुसन्धान टोली परिचालन गरेको छ । आयोगले सम्बन्धित अधिकारीहरू, व्यवसायी र निर्णय प्रक्रियामा संलग्न अन्य व्यक्तिहरूसँग पनि बयान लिने तयारी गरेको जनाएको छ ।