संकटापन्न वन्यजन्तु रेड पाण्डा (हाब्रे) संरक्षणमा समुदायको सहभागिता बढाउने उद्देश्यले आयोजना हुँदै आएको रेड पाण्डा म्याराथनको तेस्रो संस्करण यो वर्ष सोलुखुम्बुमा हुने भएको छ ।
रेडपाण्डा नेटवर्कका अनुसार प्रतियोगिता भदौ २० गते सोलुखुम्बुको सदरमुकाम सल्लेरीमा आयोजना हुनेछ ।यसअघि म्याराथनका पहिलो र दोस्रो संस्करण क्रमशः ताप्लेजुङ र इलाममा आयोजना भएका थिए । सगरमाथा क्षेत्रको प्रवेशद्वारका रूपमा परिचित सल्लेरीमा आयोजना हुने यस वर्षको म्याराथनमार्फत खेलकुदसँगै रेड पाण्डा संरक्षणको सन्देश स्थानीय समुदाय हुँदै राष्ट्रिय तथा अन्तर्राष्ट्रिय तहसम्म पुर्याउने लक्ष्य राखिएको आयोजकले जनाएको छ ।
प्रतियोगिता रेड पाण्डा नेटवर्कको आयोजना, प्ले फर नेचरको सहयोग तथा हिमाली स्वास्थ्य तथा वातावरणीय सेवा, सोलुखुम्बुको सहकार्यमा हुन लागेको हो । सन् २०२४ देखि रेड पाण्डा म्याराथन आयोजना गर्न थालिएको हो ।
म्याराथन समुद्र सतहदेखि २ हजार ३६० मिटर उचाइमा रहेको थेक्छेन पेमा छोलिङ गोन्पाबाट सुरु हुनेछ । त्यहाँबाट ४ हजार ५४ मिटर उचाइमा रहेको पिकेपिक पुगेर पुनः सोही मार्ग हुँदै फर्किने गरी ४८ किलोमिटर दूरी तय गरिनेछ । प्रतियोगितामा पुरुष र महिला दुवै विधामा प्रतिस्पर्धा हुनेछ । दुवै विधामा समान पुरस्कारको व्यवस्था गरिएको आयोजकले जनाएको छ ।
प्रथम हुनेले ट्रफीसहित १ लाख ५० हजार रुपैयाँ, दोस्रो हुनेले १ लाख रुपैयाँ, तेस्रो हुनेले ५० हजार रुपैयाँ तथा सान्त्वना हुनेले ३० हजार रुपैयाँ नगद पुरस्कार प्राप्त गर्नेछन् । रेडपाण्डा म्याराथनले खेलकुदमार्फत स्वस्थ जीवनशैलीलाई प्रोत्साहन गर्नुका साथै सोलुखुम्बुमा रेड पाण्डा संरक्षणको महत्व र यसप्रतिको जनचेतना बढाउन सहयोग पुग्ने रेडपाण्डा नेटवर्कका कार्यकारी निर्देशक आङफूरी शेर्पाले बताए ।
मुख्य म्याराथनसँगै स्थानीय समुदायको सहभागिता सुनिश्चित गर्न ५ किलोमिटर दूरीको ‘रेड पाण्डा समुदाय रन’ समेत आयोजना गरिने भएको छ । समुदाय रन थेक्छेन पेमा छोलिङ गुम्बाबाट सुरु भई सेर्गाखोप, पोङ डाँडा, फाप्लु र ठूलोघर हुँदै पुनः थेक्छेन पेमा छोलिङ गुम्बामै पुगेर सम्पन्न हुनेछ ।
यसका अतिरिक्त रेड पाण्डा नेटवर्कले विभिन्न सामुदायिक वनमा परिचालन गरेका वन अभिभावकहरूलाई सहभागी गराएर ‘पानी दौड’ समेत आयोजना गर्ने तयारी गरेको छ । खेलकुदका गतिविधिमार्फत स्थानीय समुदायलाई रेड पाण्डा संरक्षणसँग जोड्ने र यसको बासस्थान तथा जैविक विविधताको संरक्षणप्रति जिम्मेवार बनाउने उद्देश्यले म्याराथनसहितका कार्यक्रम आयोजना गर्न लागिएको आयोजकले जनाएको छ ।