नेपाल–भारत सीमासँग जोडिएको विराटनगरको रानी–जोगबनी नाकामा सुरक्षा जाँचलाई व्यवस्थित बनाउन जिल्ला प्रशासन कार्यालय मोरङले पैदल यात्रुका लागि छुट्टै मार्ग निर्माण गरेको छ।
सीमाबाट हुने आवतजावतलाई व्यवस्थित बनाउँदै भन्सार छली नियन्त्रण र सुरक्षा जाँचलाई प्रभावकारी बनाउने उद्देश्यले नयाँ व्यवस्था लागू गरिएको हो ।प्रशासनका अनुसार भारतबाट नेपाल प्रवेश गर्ने पैदल यात्रु र सवारीसाधनका लागि छुट्टाछुट्टै मार्ग बनाएपछि सुरक्षा जाँच प्रक्रिया सहज भएको छ।
यसअघि सीमाबाट भित्रिने सामानको मुख्य जाँच ‘२ नम्बर ढाट’ क्षेत्रमा हुने गरेकोमा अब सीमामै प्रारम्भिक जाँच सुरु गरिएको छ । भारतीय बजारमा नेपालभन्दा कम मूल्यमा घरायसी सामग्री पाइने भएकाले विराटनगर, इटहरी, धरानलगायतका क्षेत्रबाट दैनिक ठूलो संख्यामा सर्वसाधारण किनमेलका लागि जोगबनी जाने गरेका छन् ।
सशस्त्र प्रहरीका एक अधिकारीका अनुसार नयाँ व्यवस्थापछि यात्रु र सवारीसाधनको आवागमन थप व्यवस्थित भएको छ। यसले सुरक्षा जाँच छिटो, सहज र प्रभावकारी बनाउनुका साथै दैनिक किनमेल गरेर फर्किने सर्वसाधारण र व्यावसायिक रूपमा सामान ओसारपसार गर्ने व्यक्तिलाई छुट्याउन पनि सहयोग पुगेको छ ।
नयाँ सरकार गठनपछि सीमावर्ती क्षेत्रमा सुरक्षा निगरानी थप कडा पारिएको छ । त्यसको प्रभावस्वरूप भन्सार छली गरी सामान भित्र्याउने गतिविधिमा कमी आएको सुरक्षा निकायको दाबी छ।
प्रशासनले सुरु गरेको नयाँ व्यवस्थाले सीमामा हुने भीड नियन्त्रण, यात्रुको सहज आवतजावत, सुरक्षा जाँचको प्रभावकारिता वृद्धि र भन्सार छली नियन्त्रणमा सकारात्मक योगदान पुग्ने अपेक्षा गरेको छ ।