मोरङको उर्लाबारीमा मोबाइल चोरी गरेको आरोपमा दुई जना बालबालिकालाई मन्दिरको फलामे पिलरमा बाँधेर यातना दिएको आरोपमा दुई जना युवालाई प्रहरीले सोमबार राति पक्राउ गरेको छ ।
मोरङ प्रहरीका डीएसपी सन्तोष श्रेष्ठका अनुसार सोमबार राति करिब ८ बजेतिर उर्लाबारी नगरपालिका–३ स्थित गुरु गोरक्षनाथ मन्दिरमा ७ वर्षीय रवि उराउ र ६ वर्षीया चाँदनी उराउलाई प्लास्टिकको डोरीले हातखुट्टा बाँधेर राखिएको अवस्थामा प्रहरीले उद्धार गरेको हो । दुवै बालबालिका उर्लाबारी–३ निवासी दुखीलाल उराउका छोरा र छोरी हुन् ।
मोबाइल चोरी गरेको आरोप लगाउँदै झापाको शिवसताक्षी नगरपालिका–३ का २० वर्षीय निशान कार्की र १८ वर्षीय सुमन बुढाथोकीले बालबालिकालाई मन्दिरको फलामे पिलरमा बाँधेर राखेको पाइएको श्रेष्ठले बताए । बाँधेर बालबालिकालाई यातना दिएको सूचना प्राप्त भएपछि इलाका प्रहरी कार्यालय उर्लाबारीबाट प्रहरी सहायक निरीक्षक (असई) चन्द्रबहादुर भण्डारीको नेतृत्वमा टोली घटनास्थल पुगेको थियो ।
प्रहरीले तत्काल डोरी खोलेर दुवै बालबालिकाको उद्धार गरी आफन्तको जिम्मा लगाएको जनाएको छ । प्रारम्भिक परीक्षणका क्रममा उनीहरूको खुट्टामा सामान्य निलडाम देखिएको प्रहरीले जनाएको छ ।
घटनामा संलग्न आरोपित कार्की र बुढाथोकीलाई नियन्त्रणमा लिई इलाका प्रहरी कार्यालय उर्लाबारीमा राखिएको छ । घटनासँग सम्बन्धित थप विषय बुझ्दै दुवै जनामाथि इन्स्पेक्टर नवीन वली नेतृत्वको टोलीले विस्तृत अनुसन्धान अघि बढाएको छ ।